半裸玩火影海報！張敬軒人頭變爐頭？

KKBOX編輯室

2018/2/27

由英皇娛樂主辦、KKBOX呈獻「Hinsideout 2018 張敬軒♭♭演唱會」於6月15-17日，一連三場於紅館舉行。日前，軒仔為演唱會拍攝海報，今日他在自己的社交網站發佈了拍攝演唱會poster的花絮，又噴火又燒雞翼，立刻被網民瘋狂洗版。

髮型師認真地在軒仔的頭上噴火，而現場的工作人員就有趣的用燒烤叉於軒仔頭上燒棉花糖、燒雞翼，期間還滴了雞油在軒仔的額頭上，就像燒烤一樣。為甚麼要玩火？軒仔說：「今次演唱會主題叫『Hinsideout』，概念由SK AllRightReserved主理人主理，希望將我另外嘅幾面、大家喺熒幕外見唔到我嘅、最deep down嘅性格特質變成音樂，帶上舞台俾大家睇。所以我連衫都冇着㗎，個頭頂又起晒火。而火嘅意思，就係我將裏面團火都燃燒埋出嚟。」相隔四年再於紅館開演唱會，軒仔坦言最難是如何突破上次的演唱會，「因為14年有譚玉瑛姐姐嗰part嘅《青春常駐》、有好sexy嘅係我同Shirley姐姐嗰part嘅互動。一眨眼四年過去，今次呢個演唱會做乜嘢好呢？今次會㨂好多我自己鍾意嘅作品、大家好鍾意嘅作品，用一啲好唔同嘅形式去演繹出嚟。」至於軒仔的「火頭」，原來這個是一個頭髮Treatment「火焰護理」，乾燥、受損、髮尾開叉以及較弱的髮絲會經燃燒後自然脫落，Treatment後，頭髮會更豐盈及有彈性。

別看軒仔很鎮定似的，其實事前他亦有些緊張，「不過之前已經有好多個幕後工作人員試過都安全無事。同埋呢個Treatment嘅主理人 - 印度髮型師Mr. Gala咁啱又喺香港，SK又搵到佢、佢又有興趣玩，所以就嚟咗幫手。成個過程係好有趣、好刺激，好正！」做完「Treatment」，頭髮真的更亮澤？軒仔說：「真係『令』咗同埋滑咗！我本身有少少乾旱嘅頭髮，做完呢個Treatment之後全部都冇晒！」不過要提提大家，Treatment是由專人處理，大家千萬不要模仿呀！