歌手許靖韻（Angela）今日（15日）推出全新EP《My 25》，EP收錄了Angela這一年的故事。過去一年，對廿五歲的Angela來說並不平凡。從內地選秀節目《創造101》出發，到站上《歌手》舞台，她的願望一一達成。因此EP不同的造型也代表着不同階段的她，充滿少女味的露肩紗裙；剪裁獨特的牛仔套裝，盡顯野性一面；盤起長髮配搭黃色，滲出成熟女人味；黑色girdle款上衣，型格十足。
至於音樂方面，則收錄了不同語言風格的歌曲，包括電影《非份熟女》英文主題曲《Improper》、實力國語作品《事與願違》、由她親自填詞的廣東歌《逆流成河》、林家謙度身訂造的《原來我們都一樣》及與伍樂城的觸電之作《沒完沒了》。
收錄於EP的歌曲《沒完沒了》亦於今日上架。Angela說一收到歌詞時，並未完全理解歌詞意思，「唱咗好幾次先感覺到歌詞想表達嘅嘢。首歌係想講嗰種同對方嘅關係唔係真正嘅情侶，好曖昧，好似偷情但又唔知邊個係第三者嘅感覺之餘，又唔想結束呢段感情，係一段好模糊嘅關係，沒完沒了咁同對方喺一齊。」
MV男主角找來爆肌演員謝允出任，整個MV大部份時間刻意採用偷拍角度，帶出一種窺視的感覺，Angela經常躲於衣櫃內窺探外面的世界，「衣櫃入面嘅我其實只不過係一個幻想，又或者係我嘅一啲回憶，俾我回憶番同男主角各種好甜蜜嘅情節。但係其實衣櫃裏面嘅我究竟係邊個？呢啲就留係俾觀眾一個幻想空間。」提到拍攝難忘事，Angela就話：「我同男主角有鬧交情節，一路鬧、我一路想喊，因為通常我一俾人鬧就想喊，哈哈。歌詞入面有一句『喜歡有何卑微』，愛情入面，有時候有一方會好卑微，但係你仍然想繼續同佢喺埋一齊。」
問到現實中的Angela是否也「卑微過」，Angela坦言：「之前有一段關係就好似今日拍攝當中嘅一啲情節，好卑微，感覺好委屈，但係就係想同對方繼續一齊，我覺得每個人都會經歷過咁樣嘅一段關係。」其後Angela又自爆是「和平主義者」，「我唔鍾意嗌交，我希望同對方有一個好和平嘅關係，互相了解，生活協調。」接着笑說：「反正對方對我好就好啦。」
即聽《My 25》，聽Angela 25歲的故事
