自加入新公司後不斷作出新嘗試的鄭欣宜(Joyce)，在新歌〈先哭為敬〉MV飾演一名舞台女演員，正要演出她最後一台戲，劇情除了情緒起伏很大外，Joyce更需要拍攝持槍戲份，對她的演技確是一大挑戰，MV更邀請到著名導演彭秀慧 (Kearen)負責創作及執導，舞台劇演員阿雞(邱頌偉)、中法混血男演員黃寶漳(Mixson)、陳琬瑜及李文揚演出，面對如此有豐富經驗的班底，Joyce說可以在拍MV的同時，像參與了一場演技訓練營一樣，真的既緊張又興奮。
由於彭導及阿雞老師均是Joyce的演技訓練老師，是以正式演出時她就好像面對老師考試一樣，不過幸好二人均不停提點她，彭導更不時提出意見及不同演繹方法建議，令Joyce緊張得來又有很大得著，她說：「拍阿雞老師開槍嗰場戲時，大家氣氛都好凝重好緊張，我重要同戲中男朋友Mixson一齊搶阿雞老師把槍，當時我要大聲喝佢，之後聲都沙埋，可想而知當時幾咁激動。
其實要喺舞台上面對大班專業嘅工作人員已經好緊張，重要喺兩位老師面前演戲，個感覺就好似讀書大考一樣咁緊張。」身旁的彭導即答道：「我係刻意咁做嘅，因為平時排舞台劇有幾個月時間，但今次拍攝要喺咁短時間做到呢個效果，就好需要非常熟悉舞台演出嘅演員嚟演出。」
新歌〈先哭為敬〉MV之所以拍成一個悲劇式愛情故事，其實緣起於作詞人Wyman黃偉文的歌詞，Joyce指出：「好開心可以收到Serrini的demo，我一直好欣賞佢，因為佢係做緊我一直好想做到嘅嘢，可以隔空同佢合作到，真係好興奮，但最特別係Wyman嘅歌詞，佢將愛情故事寫出好多唔同嘅層次，可以用好多唔同方法去詮釋演繹，令到成個畫面好立體好有故事。」
對此彭導亦十分同意，她説：「當我睇完Wyman嘅歌詞之後，令我諗到好多嘢，首歌主旨係講離別，而喺我最熟悉嘅劇場舞台上，你會經歷人生所有嘅情緒、情感，到有一日你要離開嘅時候，你係會帶住一個乜嘢情緒呢？喺呢個故事入面Joyce飾演一個演員，演出完一個好成功嘅戲，今晚嚟到最後一晚演出，當觀眾好唔捨得佢嘅時候，其實佢比任何人更加不捨。至於個MV嘅結局係點，我先賣下關子，大家睇吓MV就知道。」