SoulJase與鍾舒祺合作新歌〈禁區〉 攜手直闖男女情慾禁區

唱作歌手SoulJase (何建曦)個人第一首主打歌〈Bounce Back〉一出就成為冠軍歌，得到如此美滿成績，一向大膽創新的SoulJase更加決心尋求突破，這次新歌〈禁區〉嘗試挑戰人類本能，直闖男女情慾禁區，為此更不惜代價等待一年，以求覓得如意女神共同攜手跨越挑戰，而這位讓SoulJase等待了一年的女歌手就是鍾舒祺(Sukie)。

旁人可能以為他倆相識多年，但SoulJase竟説其實他們素未謀面，他說：「原來我哋入行咁多年都未見過面，完全唔識就搵你合作，係咪好意外？」對此Sukie笑說：「我同你第一次見面就係入錄音室錄呢首歌，我講嘅第一句就係『原來我未同你講過嘢㗎』，然後第二句說話就係『外賣食乜呀？』好攪笑。」不過因為大家音樂理念相近，所以錄音時很快便進入狀態。

SoulJase指新歌〈禁區〉同樣由他的冠軍歌團隊作詞人Oscar及MV導演Douglas製作，他說：「呢首歌嘅曲風同我之前嘅好唔同，係比較新派嘅騷靈，我係搵咗C AllStar隊友、好兄弟電音DJ King (吳崇銘)幫我編曲，編得好正，十分感激佢。」

SoulJase接着説：「今次顧名思義係要挑戰禁區，明顯係一首描寫情慾嘅歌，咁好自然就係有關男同女。由一年前開始寫呢首歌就覺得需要一把女聲，而第一個人選就想到Sukie，不過嗰陣Sukie因為工作要離開香港一段時間，之後我搵咗好耐都未有合適人選，咁終於再問Sukie，結果佢可以有時間錄，而直到而家我都覺得Sukie係不二之選，佢把聲好適合隻歌個tone，冇人比佢更適合唱呢首歌。」

身旁的Sukie立即回應道：「我一聽隻歌就好鍾意，不過有幾段歌詞啲中文好深，我只係睇到字面上意思，真係到錄音室問番Soul Jase至明白佢暗示啲乜嘢。」對此，有份填詞的SoulJase自然有話要說：「延續上兩首歌各有探討人性主題，〈禁區〉就係直接講人類最真實最原始嘅慾望，放低生活上所有瑣碎事，想做就做，跨越結界認清自己心癮。」Sukie有點恍然大悟的説：「我係返到屋企再諗下，係咪講緊嗰啲嘢呢？」SoulJase插嘴説：「就係講緊嗰啲嘢，首歌好多嗰啲嘢，但我哋唔會好顯淺嘅手法，要慢慢至領略到係嗰啲乜嘢。」

Sukie更大爆SoulJase好「男人」的一面，她說：「平時我哋歌手都會有自己習慣開嘅唱法，但SoulJase佢好清楚自己想要咩好有想法，錄音嗰陣佢先錄完，然後就講咗佢嘅想法，咁我再配合，嗰刻我覺得佢好man，希望佢收貨啦。」

即聽〈禁區〉，䆁出野獸