疫情橫行 洪卓立新歌〈我們都想旅行〉MV止去旅行癮

香港人最喜歡去旅行，一趟旅行除了瘋狂購物、吃好東西，更重要的是讓自己抽離這個生活壓力大、步伐急速的城市，令身心得到放鬆。洪卓立（Ken）於21日推出新歌〈我們都想旅行〉，而旅行對Ken來說是必要的事，是他釋放負能量和放鬆心情的最佳途徑，這首歌的創作靈感就是來自Ken去旅行時的一個習慣。

他說：「就算啲鋪頭閂晒，我都好鍾意夜晚周街走，個感覺係好舒服，好似你愈行得耐就愈放低得多負能量、唔開心嘅嘢，所以每一次去旅行我都會咁做。而家呢隻歌嘅歌詞就正正講緊行緊路嘅呢一段過程。」

〈我們都想旅行〉由Cousin Fung作曲，周耀輝填詞，廖志華監製。Ken坦言這首歌是他近五至七年來最難唱的歌，更以「發洩」二字去形容這首歌，「去旅行我會開住google map漫無目的周圍行，有時為咗影幾張相，我會特登搭一、兩個鐘頭去一個地方，影完就返酒店，過程好似好無聊，但係確實係有治療嘅功效，有一個放低一啲嘢嘅功能喺度。」

歌曲MV亦有別於一般「靚靚仔仔」的街景拍攝，整個MV都是由一名插畫師畫出來，Ken表示十分期待，「有好多畫面而家唔可能搭飛機去拍，於是就搵咗呢位叫阿萊嘅插畫師去實現一啲想拍嘅畫面，可能係冰島、日本等等嘅地方，可以畫到我瘦啲、又可以畫到我靚仔啲，哈哈。」

因為疫情關係，令很多喜歡去旅行的人都無法隨心所欲地飛，Ken亦然，他說：「喺疫情好轉之前，我哋要好好照顧自己嘅心靈健康，提醒自己要快樂，期待下一次旅程。」他續說：「希望每一年都有時間去唔同嘅地方，可能好近地方嘅旅行都已經達到我呢首歌嘅效果，影吓相、食啲好食嘅嘢，其實最重要係叉足電返嚟繼續工作。」

即聽〈我們都想旅行〉，聽住歌FF去旅行！