謝霆鋒甄子丹音樂較量 謝霆鋒：「一定要俾最好嘅嘢丹哥！」

由已故導演陳木勝執導，甄子丹、謝霆鋒主演的電影《怒火．重案》，是個正邪對立，雙雄角力的警匪故事。二人相遇，既是一場生死對決，亦可能是潛藏內心，遇強愈強的異能爆發。這次是繼十五年前電影《龍虎門》後，子丹與霆鋒再度合作。

拍攝期間，二人已對該片埋下不少的愛，子丹更建議霆鋒可以為電影創作主題曲。巧合地，霆鋒在拍攝時，腦海已不斷浮現好些旋律，當逐一記下來，便成為主題曲的雛型。今日（30日）由霆鋒作曲兼編曲的電影《怒火．重案》主題曲〈對峙〉正式上架。

在創作主題曲時，霆鋒不時向子丹詢問意見，務求一同參與創作，霆鋒說：「成件事出嚟我好希望係我哋兩個嘅事。於是我就請丹哥，『丹哥，你可唔可以彈呢part嘅琴呀？』」子丹表示自己很喜歡歌曲旋律，一聽便愛上，更笑謂霆鋒找他演出MV是個「冒險」的決定，「我好鍾意個melody，very good！之後霆鋒就好大膽、冒險呀！好冒險地搵我去幫佢拍攝呢個mv，因為搵我係好容易拉低咗成個mv嘅觀感。」

霆鋒膽粗粗邀請子丹客串MV，結果子丹一口答應。MV拍攝現場，分別設定一紅一藍的場景，霆鋒屬於火熱的紅色，子丹則是冷酷的藍色，二人壁壘分明。難得請來鋼琴高手子丹助陣，為了隆重其事，劇組找來一部價值二百萬港元的三角演奏琴，供子丹彈奏，霆鋒坦言：「因為我覺得一定要俾最好嘅嘢丹哥彈！同埋我好羨慕男仔可以彈琴，一個武功高強嘅人彈琴係一件好有型嘅一件事！」

而為了拍攝彈奏部份時表現精準，子丹在事前也加緊練習，「我都唔想太肉酸嘅，盡量去令到成件事好啦。anyway首歌係好正，我係嚟叨吓光，哈哈。」另外，霆鋒也不敢怠慢，拿出全球只有二十九支的私人珍藏電結他，營造一個最華麗的音樂火拼畫面。

即聽〈對峙〉，一起火拼