新歌〈一千零一頁〉張繼聰作曲 李靖筠受寵若驚

李靖筠（Gladys）去年推出作品〈第千次重逢〉，歌曲描述一對戀人相戀千世過後，還是未能開花結果。如是者，翻過一千頁後，終於來到醒覺一刻。Gladys決定以今年第二首派台歌〈一千零一頁〉，為這段虐心的愛情故事打開新一頁。

Gladys表示歌曲〈一千零一頁〉對她意義重大，「今年年頭突然收到張繼聰寫俾我嘅demo，非常之受寵若驚。因為我上年同佢拍過一部電影，傾偈嘅時候佢話幾鍾意我啲音樂，但我冇諗過佢竟然真係寫咗首歌送俾我。」歌詞部份，則交由從第一隻專輯開始已為Gladys填詞的小克操刀，「小克將〈第千次重逢〉寫埋下集，所以呢首歌就叫〈一千零一頁〉。講一對情侶，佢哋每一世都一齊，一齊咗一千次，但每一世都結唔到果，經歷咗一個咁樣嘅循環之後，就決定要打開新一頁，要離開呢個循環。」編曲及監製方面，Gladys則邀來徐浩合作。

而為了能完美呈現〈一千零一頁〉的故事，MV特意用上不同年代的電影風格，交代戀人經歷不同時代交替。起初Gladys相當擔心，因為MV製作規模龐大，亦需要在拍攝技巧及服裝上多加巧思，於是她便邀請了好朋友阿簡為她的MV執導，才可以順利將構思一一成真。至於男主角，Gladys找來早前於電影《我的筍盤男友》一起合作過的陳家樂擔任，Gladys說：「今次佢唔係做導演，係做我MV男主角。」

家樂表示：「唔係做導演好正常吖。」隨後Gladys大爆原來家樂很喜歡做導演，更經常叫Gladys找他執導，家樂解釋：「諗住做演員冇得收錢，做導演有得收吖嘛，哈哈。」Gladys又笑言家樂在她心目中，是一個穿起西裝會變得很帥的男生，所以即使這次MV穿越不同年代，家樂換上不同服裝，亦顯得十分稱身。相反衣着一向走文青風格的Gladys，需要挑戰不同服飾和禮服，令她大感興奮，亦在充滿歡笑聲中順利完成MV拍攝。

即聽〈一千零一頁〉，感受虐心的愛情故事