突破尺度 谷肌出浴 Anson Lo新歌化身「阿牧」 唱出單戀心聲

突破尺度 谷肌出浴 Anson Lo新歌化身「阿牧」 唱出單戀心聲
KKBOX編輯室
KKBOX編輯室

今個夏天,全城高溫焫著!當紅男團MIRROR將於暑假期間,每週推出一首全新單曲,其中近日憑劇集《大叔的愛》人氣急升的成員盧瀚霆(Anson Lo)昨日(7日)率先登場,推出年度第二首個人歌曲〈不可愛教主〉,實行變身「阿牧」訴說單戀故事。

提到〈不可愛教主〉在26歲生日當日面世,暖男Anson Lo笑言新歌是「特備禮物」:「呢首歌唔係送畀自己,而係送畀神徒嘅生日禮物。上次出歌已經係一月尾嘅事,所以好想喺生日正日,同fans有一個遙距嘅共同回憶。」作為《大叔的愛》片尾曲,Anson Lo表示〈不可愛教主〉從劇集角度出發,記載「阿牧」的心路歷程:「監製Tommy希望片尾曲由『阿牧』去唱,唱出佢對阿田嗰份不求回報嘅愛;填詞人林若寧亦都喺大家嘅戀愛角度出發,因為每個人都試過掛住一個人、甚至單戀,明知對方唔會鍾意自己,仍然奮不顧身去守護佢。相信聽到呢首歌嘅朋友,心裡都會浮現出一個好想見嘅人;同埋『教主』呢個稱號,我覺得只要你鍾意嗰個人,佢就係你嘅教主。」

與陳漢娜貼身共舞

過去曾為〈一所懸命〉、〈EGO〉等歌曲拍攝MV,經驗豐富的Anson Lo卻透露,〈不可愛教主〉屬全新體驗:「出道以嚟我嘅三首solo作品都係跳唱形式,MV一定同跳舞有關,但係今次採取全劇情式拍攝,我諗fans同觀眾都會幾驚喜,見到一個唔同嘅Anson Lo。」為配合歌曲設定,團隊特地情商陳漢娜(Hanna)擔任MV女主角,不過Anson Lo竟直呼緊張,更自爆為MV獻出「第一次」:「人生第一次拍MV係有女主角,最難忘係同Hanna頭貼頭嘅場面,因為喺我嘅演藝生涯中,第一次同女主角有咁貼身嘅接觸,當下真係好緊張!排戲時都有啲尷尬,但係拍攝當日,我感覺到Hanna嘅專業,每一個機位佢都做到100%;佢亦為咗MV專程學舞,真係好辛苦佢。」

掌上壓急救肌肉

除了與Hanna唯美共舞,Anson Lo還在MV中突破尺度,大晒結實胸肌,實行向神徒派糖!對此他亦直認:「今次有啲鏡頭比較大膽,例如露背肌、甚至沖涼,對我嚟講算係幾大尺度!最近無乜時間操練,演唱會後只係做過兩次gym,真係好驚冇嘢畀人睇,所以拍攝展示身材嘅場面之前,我就不停做掌上壓,埋位前都要做多幾下。」

對於《大叔的愛》引發全城熱話,Anson Lo坦言感激觀眾支持,亦視劇集為演藝事業中的一個標志:「我覺得《大叔的愛》係一個里程碑,睇到自《男排女將》之後,自己有乜嘢唔同嘅改變。見到大家鍾意《大叔的愛》、凌少牧,真係俾咗我好大信心。」與喜劇有緣的Anson Lo亦透露,首部主演電影《假冒女團》有望在今年上映,期待為觀眾展現不同面向。

即聽〈不可愛教主〉,訴說單戀故事

KKBOX編輯室
KKBOX編輯室

延伸推薦專輯

最新文章列表

    share to facebook share to facebook share to facebook share

    使用 Ctrl + C 複製