陳柏宇 X Kiri T Chill住合唱〈10,000ft.〉 MV同步型格「Un」上線

陳柏宇（Jason）一直在音樂路上尋求新鮮感，今年更在曲風及唱法上作出明顯改變，令樂迷耳目一新。早前Jason玩crossover，與有「陀地歌姬」外號的Serrini合唱〈網絡安全隱患〉，Jason今次邀得涉足於美國獨立音樂圈的唱作女歌手Kiri T合作，重新演繹Kiri的〈10,000ft.〉，效果叫原創者大感驚喜！MV同步型格推出，希望帶給樂迷新驚喜。

Jason起初被Kiri的音樂吸引到，才促成今次的合作：「因為佢啲音樂好refreshing，喺香港唔係成日聽到，加上係英文，成件事爽啲。」至於為何會揀中Kiri的〈10,000ft.〉來合唱，Jason指：「我覺得啲歌係寫俾一個人唱嘅，但呢隻歌唔會有一種兩個人唱就變得超odd（奇怪）嘅感覺。最原先我哋係諗住將〈本能寺〉同〈10,000ft.〉jam埋一齊，但唔係好想做到medley咁，加上我覺得咁樣crossover的話，我再去唱一啲我自己唱過無限次嘅歌又會好悶，所以就揀咗〈10,000ft.〉。」而Jason更覺得揀Kiri本身的歌另有好處：「因為Kiri好知道自己嘅音樂想點，所以揀佢嘅歌，佢對自己嘅音樂係最熟悉，所以係好嘅。」
作為〈10,000ft.〉的創作者及原唱者，Kiri覺得今次的crossover效果如何？「隻歌其實我唱咗好多次，我覺得呢個version係我最鍾意嘅version！首先係我搵Nick彈結他，個feel已經有啲唔同，之後聽完Jason唱之後，又inspire到我有第二啲演繹方式，所以Jason唱完之後，我返去再錄過另外一個vocal，我而家都了解隻歌多咗。」這個行動讓Jason直豎拇指，大讚有誠意。

Jason坦言自己一直響往唱英文歌：「因為咬字上可以有好多唔同嘅發揮，所以今次喺Kiri眼中我開頭都咬得好緊，我本身都有一種好鍾意咬實啲字嘅感覺，但係今次本身我覺得英文字冇廣東話咁執著咬字嘅方式，反而Kiri俾到好多inspiration我，又或者引導到我去咬一種佢認為鬆啲嘅方法，令到成件事可以chill啲。」入錄音室無數次的Jason，在今次的錄製過程中，發生了一件難忘事，他笑說：「當Kiri想我relax啲、『un』啲嘅時候，佢嘗試去同我做一個exercise，叫我揈下個人、鬆啲muscle，嗰一刻我心諗⋯⋯哈哈！其實我覺得唱多幾次自己就會有嗰個feel。」而這個很relax、很「un」的feel，亦在MV中呈現。

承繼首個crossover作品 - 與Serrini合作的〈網絡安全隱患〉中以monotone為主調，彷如讓Serrini走進Jason的音樂世界裡面，而今次在〈10,000ft.〉MV中，畫面先由Jason開始，拿著酒杯的他在舊樓中梯間遊走，配上monotone，畫面的復古味滿瀉。接著到Kiri現身，身穿紅色連身裙、優雅攤坐在梳化的她，與Jason交集，似有還無，但卻逐漸影響到Jason，不單為MV帶來一點色彩，也喻Kiri亦同樣走進了Jason的音樂空間內。
經過今次的合作，讓Kiri對Jason改觀：「合作之前，我以為佢好靜㗎！但係合作之後發現原來Jason係好搞笑，可能係被佢啲歌影響到個印象，我覺得佢係唱歌好叻同埋唔係點講嘢嗰啲talent，合作之後發現原來Jason搞好多gag嘅，被佢呃咗！」雖然Kiri呻自己「被騙」，但兩人均期待下次再度合作，更想推出新歌，他們透露：「其實本來我哋有諗過出新歌，我哋仲哼咗差唔多成首歌出嚟，跟住發覺我哋要做完今次個crossover先，下一次寫新歌啦！」

先後與其他歌手搞crossover，Jason預言已在物色下一位合作的歌手，他指：「Crossover都幾好，可以令到自己接觸多啲唔同類型嘅音樂，唱人哋嘅歌時，畢竟可以有一種跳出本身個vocal character嘅諗法去唱。因為唱自己嘅歌嘅時候，第一樣會諗嘅係究竟我唱呢首歌時個聲會係點樣，我想跳出自己唱歌嗰個聲音。」足證Jason一直在音樂上求變的想法。Kiri讚許Jason的想法，認為他是真的熱愛音樂才會不怕麻煩或工序去求變。

即聽〈10,000ft.〉，型格上線～