彌補散失遺漏 張敬軒新歌〈賽勒斯的愛〉以愛撼動宇宙

正舉行「The Next 20 Hins Live in Hong Kong」演唱會的張敬軒推出全新作品〈賽勒斯的愛〉。

歌曲的創作背景是軒仔近月來十分感興趣的題目：人工智能（AI），「由於我哋今年有Metaverse的project，而Metaverse入面除咗大數據，其中一樣都好重要嘅就係後台AI嘅編程。」在元宇宙的計劃中，有軒仔自己設置的兩個分身：Hertz及Cherlas，二人均由AI系統發展而成。

歌曲及MV的故事是一個「聯想」，軒仔相信AI在不久的將來，會有自己的思維、情感，「所以今次呢首歌係講喺元宇宙計劃入面嘅兩個數碼人物，佢哋冇按既定程式去執行命令，穿破咗版塊、鏈塊計法，兩個人之間開始產生人類感情。而佢哋喺現實生活中，因為性格唔同而冇辦法相處、相愛，但當佢哋進入到元宇宙，因為大家都係行緊同一個logic，所以就能得到相處、相愛嘅機會」。而這正正反映出真實世界人們所面對的情況，同時亦是這首歌的創作背景，「喺元宇宙當中，大家可以選擇一個角色俾自己、可以實現到好多現實世界唔可以實現嘅嘢，甚至有啲感情，現實唔可以喺埋一齊，但喺元宇宙入面大家就有一齊相愛同相處嘅方式」。

MV中，軒仔飾演賽勒斯，他能任意穿越現實與元宇宙，只要輕觸耳背上的傳送鍵，便可穿越到元宇宙空間。軒仔一次在虛擬世界中下錯決定，對著心儀的女生卻斷言拒愛，他誤信在虛擬的元宇宙空間作這決定，傷害性會同樣虛幻似無，但情感既穿越時空，也穿越身心，不但令對方留下一道傷痛烙印，更甘願遺棄自我，斷送現實中純潔的靈魂。

創作班底方面，軒仔找來兩位瑞典音樂人SAMDELL及Amadeus Sögaard作曲，「其實我同SAMDELL係網友，因為我見到佢最初有幫Justin Bieber幾隻歌做過一個concert的live arrangement，所以我就聯絡佢，同埋佢亦有為好多韓國歌手、組合作曲，所以佢係十分熟悉亞洲樂壇曲風；Amadeus嘅daddy係瑞典一個好出名嘅歌手，佢自己亦都係一個好好嘅歌手。」歌詞剛由T-Rexx操刀，同時亦是二人首次合作，「我睇過佢近期嘅作品，覺得好有心思。呢位新晉填詞人喺文字、喺畫面嘅敍述，或者心情嘅表達上都好擅長。後來識咗佢先知道原來佢係rap人，覺得佢會做啲好有態度嘅音樂，但原來係寫情歌又寫得好好，感情好細膩。」

即聽〈賽勒斯的愛〉，化一刻為無限