MIRROR 成員盧瀚霆（Anson Lo）於今日推出全新跳唱歌曲〈King Kong〉，並首次擔任 MV 導演，以 Virtual Background（虛擬背景）拍攝超現實故事情節。首次執導的 Anson Lo 坦言這是一次難以忘懷的驚慌體驗！
〈King Kong〉的 MV 靈感來自《移動迷宮》系列電影，Anson Lo 希望能向電影致敬，所以 MV 的開場參考了電影來拍攝，他說：「喺升降機上咗嚟之後，就去到一個乾旱嘅沙漠，大家為咗爭一支水而展露咗唔同人性嘅決定，作出乜嘢選擇，其實成個故事配合返歌詞內容，比喻人為求要得到想擁有嘅嘢而競爭、比賽，但其實好多時同自己比較或者贏自己之餘，好大機會可以一齊贏，大家一齊擁有一個好好嘅成果，可以分享。」
今次 Anson Lo 首次擔任導演，他形容是一個很驚慌的體驗，他解釋道：「冇諗過自己要參與嘅部份有咁多。以往自己 Expect 做導演可能只係諗 MV 橋段，大家著乜嘢衫，好片面嘅設計概念，但今次執導〈King Kong〉之後，就發現好多嘢都要顧及，除咗要顧及 Storyline，仲要顧及幕後製作，例如 Rundown，或遇到困難時，要調度拍攝次序，甚至演員演繹方法、情緒，導演都有責任去講，去主導呢件事。今次係一個係驚慌嘅經歷，因為發現自己好多嘢都唔識，喺幕後管理方面好多嘢都唔識，要人哋教我點去做稱職導演。」Anson Lo 表示，這為他帶來無比的壓力，並續道：「如果話自己係呢個 MV 嘅導演嘅時候，就好似 MV 100% 好與壞都完全自己造成，所以由 Day 1 開始都好想確保 MV 質素係好，或者表達故事同〈King Kong〉本身首歌詞係 sync，呢個係最大壓力來源。」
Anson Lo 另一個壓力來源，相信是因為拍攝上的不確定，事關今次 MV 很多畫面都要配合虛擬背景，於現場同步處理拍攝，過程中困難重重，他道：「以往都試過 book 酒店或用廠景拍攝，但今次用咗虛擬背景，喺虛擬世界，就乜嘢都有可能，就算空間感、大細，同背後物件距離都可以自由調節，係好大嘅自由度，但佢嘅困難度唔比實景少，今次拍咗兩日，最大嘅困難係連接上有阻滯，變相用咗好多時間喺轉場景，會用上半個鐘或者一個鐘去重新 set up，係好消耗時間嘅一個拍 MV 方法，但今次用新方法拍攝係好得意嘅嘗試，可以用到一啲喺香港現實生活中未必有嘅場景，喺一個不存在、未知世界裡面去進行〈King Kong〉嘅故事情節。」
由於現場各個場口準備需時，加上拍攝內容甚多，結果今次拍攝時間打破了 Anson Lo 過去所有 Solo MV。Anson Lo 說：「〈King Kong〉分開咗兩日拍，因為拍嘅嘢實在太多，故事情節同跳舞比例比以往多好多，所以兩日合共用咗接近 40 小時拍攝。以往拍攝 Solo MV 最多只需二十多個小時，所以今次係拍攝時間最長嘅一次，亦係最攰嘅一次，因為開拍之前拍緊劇，跟住連續拍兩日 MV，中間出席咗一個工作 event，拍完 Day 2 後就要立即去拍劇，拍劇後又要再做第二樣工作，結果咁多日只係瞓咗 3 小時，所以休息時間亦係最少嘅一次，係一個破紀錄嘅 MV。」
既挑戰導演工作，又挑戰最長工時，Anson Lo 還挑戰了自己對造型上的愛美標準！穿上背心大騷麒麟臂，更滿身傷痕，不再「青靚白淨」！Anson Lo 笑言：「今次 MV 造型係自己史上最污糟邋遢、最不修邊幅，對我標準嚟講係好大膽挑戰，因為我通常著長袖，得兩件 Layer 算少，而且一定長袖、西裝居多，希望今次 MV 會令大家覺得同以往 Anson Lo 嘅跳唱造型有啲唔同。」
另外，繼去年電影《假冒女團》後，Anson Lo 於〈King Kong〉MV 中亦有親身上陣拍攝拳拳到肉的武打場面，他說：「呢個 MV 裡面有啲動作武打場口，今次嘅動作亦係以往拍戲時未試過，對上一次武打場口係上年拍攝《假冒女團》，當時學咗好多同功夫、踢腿有關嘅嘢，今次〈King Kong〉嘅打鬥就比較貼地少少，冇咁專業踢腿嘅招式，但今次用嘅 trick 係我未試過，例如趴地被人拉去後面，係喺電影常見嘅情節，但今次自己就可以試吓。」