黃妍(Cath)於12月再為樂迷送上本年度全新作品〈刮骨〉，單是看歌名也可能會令人「感受」到的那份「痛」。Cath想在新歌中表達出，每個人生來都像一顆獨一無二的水晶，為夢想閃閃發亮，但隨着成長的經歷，水晶的獨特被一刀一刀地刮走，令所有水晶變得相似之餘，更令原本光滑的表面逐漸負上一道深深的刮痕，無法完美地反射陽光，慢慢變成平平無奇的石頭，歌詞中的「四周狠狠刮下我的笑容」，就是負責作曲的Cath與填詞人王樂儀想道出對成長的無奈與掙扎。
〈刮骨〉早前獲選成為舞台劇《無法成長的我們》的主題曲，並讓捧場觀眾先聽為快，隨着〈刮骨〉正式上架，MV於12月3日推出。Cath透露，不知是巧合還是命運安排，歌曲講成長，而她拍MV時也上了成長的一課。她說：「有一幕要我浸喺水入面幾個鐘，因為我細個試過浸親，所以一直都好驚水，拍嗰日我都好猶豫，因為真係要浸個頭落水度，我其實NG咗幾次，又問咗幾次係咪真係要浸，我真係好驚，驚到好似要窒息咁，到最後真係做到，都算係一種『刮骨療傷』，真係有所成長。」
提到《無法成長的我們》，已於上月圓滿落幕，今次是Cath演出的首套舞台劇，她更獲委以重任，做女主角擔正，Cath坦言事前感到很緊張，她說：「今次係我第一次參加嘅全舞台劇演出，仲要做女主角！舊年年尾以音樂劇《吃貨的人生》嘅形式踩舞台，着重嘅係唱歌比較多，但係《無法成長的我們》真係齋演戲，所以演出前我都好大壓力。加上嗰陣時我哋overlap咗好多嘢，最後我哋只係剩返三星期嘅時間去排練同背劇本，所以所有嘢都好緊張，我好勤力咁去記台詞，因為最驚嘅就係唔記得啲台詞。」
Cath續說：「另一個得着係我自身嘅，因為我本身唔係好識得表達自己，一有啲咩情緒就會用寫歌或文字去表達，但係喺呢套戲裡面，尤其是做舞台劇，你所有嘢、感情都要用表情、動作、言語去表達，對我嚟講係個挑戰，好好彩馬生、阿檸、釗峰同其他演員都好仔細幫我去解繹，令到而家嘅我會諗多咗，思考上細膩咗，識得用言語或行為去表達自己，係個好大嘅得着。」
Cath更憶起劇中有厝有要與釗峰吵架，自己下了苦功去演，幸好朋友們的意見都有讚，更有人跟着哭，令她很感動，Cath更坦言自己有「完騷後遺症」，希望有機會再參加演出。