過山車

作詞：李崇銘     作曲：李崇銘

演唱：李崇銘

火車這馬欲𤆬咱去佗?
上愛的柑仔店敢閣底遐?
汽水的味 囡仔的聲
細漢的一切 再會啦


火車這馬欲𤆬咱去佗?
佮家己的倒照影開講
為著別人 放棄的夢
攏佇咧磅空 外口等我

請你原諒我 講袂伸捙 袂當完成你的夢
請你原諒我 離開遮
袂當做你上聽話的孝順囝


火車這馬欲𤆬咱去佗?
天頂的風吹 伊敢會知影?
塗跤的物件 一卡又一卡
生份的都市 我來也

請你原諒我 哭袂出聲 目屎拭拭就起行
將你的願望 留佇遮
這馬開始家己的夢家己寫


火車這馬欲帶咱去佗?
田岸邊的伊 敢有咧看?
相仝的月娘 無仝的陪伴
小可思念 故鄉的人