吳晟
作詞：吳晟 作曲：吳志寧
抑是喝拳啉酒，大聲唱歌
抑是恬恬仔對飲，唉聲嘆氣
抑是講東講西，論儂長短
消磨百般無奈的暗時
這是阮的店仔頭
這是阮的廣播站
這是阮入夜以後
唯一的避難所
千百年來，永遠則爾鬧熱，永遠則爾稀微
千百年來，千百年後
無可能出頭的阮
只是一陣布袋戲翁仔
佇在店仔頭，晃來晃去
無知誰儂咧搬弄
塗豆，復來一包
晃頭仔，復來一杯
電視啊，汽車啊，都市轉來的少年家啊
毋免共阮展都市的虛華
店仔頭的椅條頂
坐咧開講，親像塍塗赫爾仔戇的阮
長長的一生，復安怎行
嘛是店仔頭頭前即幾條
短短的牛車路