摸黑樹林拍MV舞傷腳
 Aka＠SG憑歌寄意 谷底等曙光

女子組合Super Girls隊長趙慧珊(Aka)今年繼續「單飛」推出新歌，鼠年首隻派台歌〈到底之後〉近日推出，歌曲講述人生遇到困難陷入絕境時，不如嘗試果斷地抽身而退，接受事件的完結，即使過程痛苦，總比停在原地繼續折磨自己好，正如歌名一樣，去到谷底後就能看到曙光，有另一個新的開始。

日前Aka為歌曲拍攝MV，除於室內拍攝外，Aka還到郊外取景，其中一幕更爬上一棵大樹，Aka表示︰「第一次爬咗咁高嘅樹拍攝，其實開始幾驚，因為未試過爬樹，但最驚唔係因為高，而係樹上嘅蟻，樹上有好多蟻，當我撐上去時，整死咗好多蟻，所以真係對佢哋唔住。」

為了要營造谷底的感覺，Aka特別於凌晨時分到西貢的樹林，還把早前於韓國學的舞技於MV中展現，她表示︰「MV中加入我在韓國訓練嘅舞步，晚上在樹林內跳舞，加上導演設置嘅燈光效果，演繹出在谷底跳舞嘅感覺。」不過拍攝時她卻遇上意外整傷腳，她說︰「因為泥土有啲濕同有好多石，而且夜晚拍攝，我睇唔到地下，有一些樹枝同葉，當跳舞有一個高難度動作，我要跳起隻腳，結果就整到腳同小腿中間位置，大家都聽到『卜』一聲，當時我係擔心會骨折，好彩唔係，第二日全日行路都係痛，以前都未試過，可能因為在樹林入面跳。」

提到歌曲講人生困境，Aka坦言亦曾遇過，故想將經歷分享給大家，她表示︰「呢首歌係我一直都好想唱出來嘅感覺，我亦曾遇過困境，當時覺得做咩都唔順利，加上有好多批評聲音，自己好唔開心。但之後我就諗為何不承認自己去到谷底呢？當自己去到谷底時，原來你會發覺冇嘢可以驚，你會覺得仲有咩比現在更衰呢！」

即聽新歌，谷底反彈