Mirror成員Anson Lo、AK、Jer同步推出新歌 MV各出奇謀
人氣組合Mirror繼姜濤及陳卓賢推出個人單曲後，近日另外三位成員Anson Lo盧瀚霆、AK江熚生及Jer柳應廷亦分別推出個人單曲。三位成員歌曲風格迴異，卻突顯成員特質。
Anson Lo新歌〈一所懸命〉是他首度創作的歌曲作品。除了旋律創作外，Anson Lo更與監製Edward Chan一同構思編曲，以炮製出最具個人風格的跳唱作品。Anson Lo分享道：「我從未試過作曲編曲，但我同Edward喺錄音室逐粒音逐個Beat砌出嚟，係一個好特別嘅經歷，而且Edward教咗我好多以前冇學過嘅音樂知識，令我大開眼界。」
另一成員AK的新歌〈特登〉同樣是跳唱作品，不過感覺卻很Chill。AK感謝監製徐浩為他度身訂造這首歌：「香港常見嘅跳唱作品偏向重Beat或者節奏快速，今次我呢首〈特登〉感覺輕快得嚟編曲亦較少見。製作時我同徐浩都不斷溝通，首歌嘅Key同旋律都好配合我把聲。」
至於Jer則有王雙駿負責監製其處男作〈水刑物語〉，一首講述從失戀走出傷痛的情歌，屬高難度演唱作品。Jer也坦言錄音時感到挫敗，他說：「對新人嚟講，要演繹情緒轉變咁大嘅歌曲係比較困難。第一日錄音時感覺好無助，因為自己唱咗咁多年歌，冇諗過入到錄音室會咁失落，成日問點解唱歌咁難。但唱到第3日，終於由歌詞表達到心情演繹都拿捏得好好多，最終亦順利完成。」
3位成員向來事事力求完美，所以在拍攝MV期間，大家都付出了不少努力。就以Anson Lo為例，今次〈一所懸命〉MV的跳舞場景比Mirror的MV還要多，換裝也較頻密，所以足足用了18個小時拍攝。而其中一場於直昇機停機坪拍攝的畫面，Anson Lo更以「震撼」來形容，他說：「我從未上過直昇機停機坪，上到去已經『Wow!』一聲嗌咗出嚟。有種終於上到去，實現夢寐以求畫面嘅感覺，而拍攝嗰陣氣溫只有9度，鏡頭外上一秒我仲著住羽絨，下一秒就已經除衫拍攝，仲要扮到好鎮定又好型，但其實個咀已經不停打震。」
AK〈特登〉的MV則有一班隊友及好友力撐，令他十分感動。AK透露道：「Lokman同Frankie都有喺MV出鏡演個小角色，而Tank（《全民造星2》參賽者）亦為我呢隻歌編舞。Tank好熟我，知道乜嘢pose我會做得好睇，配合編曲為我精心度咗好多動作。相比起一般香港跳唱歌曲嘅硬朗舞步，我呢隻舞會俾人截然不同嘅感覺。」
相比起Anson Lo同AK，Jer就得到花姐加持，為他執導〈水刑物語〉的MV。Jer十分感激久未執導MV的花姐為他出山，Jer說：「我一聽旋律，就想到要拍攝水底世界嘅故事，當時仲諗咗啲畫面，搵咗啲reference俾花姐。花姐好想做好件事，於是決定執導MV，所以十分多謝佢。」但Jer原來不熟水性，拍攝期間一度擔心發生意外。他回憶說：「落水嗰一刻有掙扎過唔想再拍，因為我唔熟水性，仲要孭住鉛潛落3米深嘅水底，池底又黑又冇乜光，好冇安全感。不過花姐一直鼓勵，我又不斷嘗試，工作人員又幫我做足充足準備，到最後我終於克服恐懼，即使潛落水再上水面時因為水壓搞到個胃好唔舒服又想嘔，仲飲咗幾啖水，但最終都拍出最靚嘅畫面。」
近期新型冠狀病毒疫情尚未穩定，但Anson Lo、AK及Jer仍各有各忙。Anson Lo與Jer除了繼續參與電視劇《男排女將》的拍攝外，二人亦都落力拍片氹Fans。Jer說：「拍攝現場每個角落都必備酒精，工作人員亦時刻提醒我哋要洗乾淨手先攞食物，所以防疫方面都算做得好充足。不過唔使開工時，都唔係好夠膽出街，多數會留喺屋企。拍片唱歌俾Fans聽，等大家留喺屋企都可以聽到我哋嘅歌聲，冇咁悶。」
Anson Lo說：「拍劇以外，我亦準備緊第二首Solo歌，錄音時都會份外小心，不過只要注意衛生夠乾淨，都唔係太驚。唔使開工嘅日子，我通常會留喺屋企做gym或者拍下YouTube片。因為2020年我有個新目標，就係重新Run返我個Channel，出返多啲片。所以近期都會密密剪片，同埋計劃下拍乜嘢主題俾大家。」AK則說：「抗疫時期其實亦係最佳嘅增值時機，我而家抽多咗時間上堂學唱歌，喺屋企亦會努力練習，裝備好自己，期待下一次喺台上演出嘅機會，到時好好發揮！」
延伸閱讀
最新文章列表
