SoulJase推出首張個人EP《藍染 Self Portrait》 大玩限制主題

期待多時，SoulJase （何建曦）終於帶着他的首張個人EP專輯《藍染Self Portrait》與歌迷見面，SoulJase直言花了五年時間創作碟內作品，而碟內更破天荒地包含一篇七千多字的文案，內容更有描述「主角被校園欺凌」、「人妻係怪獸」及「經歷SM情節」，實在令人意想不到。

新專輯文案 源自自己將推出的愛情小說

SoulJase解釋：「唱片內大慨七千字嘅文案，其實就唔係講我自己嘅，係一個故事線，取自於我今年內會推出嘅一本愛情小說，入面有好幾個章節，我將其中一個章節抽咗出嚟，因為呢段故事可以串連起呢五首歌，係我創作呢個故事時借題發揮出來嘅，而唔係發生過喺我身邊。」至於情節如此精彩豐富，可有想過拍成網劇、微電影？「我寫上一本小說嘅時候已經有好多畫面上嘅構想，我覺得歌曲可以表達到嘅始終有限制，而呢個小説又幾有畫面感，所以若果可以拍成微電影，相信可以俾到大家更大嘅思想衝擊。」

歷時五年 講述人由慾望至絕望

說到手上五首花了五年時間創作的新歌，SoulJase不禁興奮地說：「我由2015至今歷時五年，構想人從慾望至絶望的過程，從而揭露人性陰暗面。〈Bounce Back〉主題係講謊言，〈阿愁〉係講哀愁，〈禁區〉係講慾望，而點題之作〈藍染〉就係三個議題嘅總結，講社會上大家點樣互相感染，因果循環，所有嘢都會傳返去自己身上。而最後一首歌就係講一啲毀滅性嘅議題。」

專輯封面用心 人手製西裝配「泥土」 呼應毀滅性議題

而SoulJase今次拍攝唱片封面的服裝，其中一套全人手製作的西裝外套是他最喜歡的，他說：「呢件衫特別嘅係佢每一面每一角度睇都唔一樣，好呼應唱片嘅解構主題，每一個角度都係人嘅唔同面相，好豐富。」不過SoulJase的好拍檔導演Douglas卻喜歡搞搞新意思，命人用咖啡粉扮成泥土，灑在SoulJase面上，以呼應SoulJase所説的毀滅性議題，對此SoulJase回應説：「因為唔係真係泥，所以其實係好有咖啡香味，一啲都唔辛苦。」

即聽《藍染Self Portrait》，感受SoulJase靈魂呼喚