馮允謙拍攝〈思念即地獄〉MV 刻意全日不笑「扮衰人」

唱作歌手馮允謙(Jay Fung)之前多首歌的MV都以太空未來世界為背景，特技效果非常突出，是以新歌〈思念即地獄〉MV特別令人期待，故此唱片公司找來電影演員談善言及岑珈其演出，以配合MV的吸血殭屍元素。

而身分為殭屍獵人的Jay Fung也手持一支古典手槍，配合一身深沉魅幻紳士造型參與演出，為了放低正氣形象投入角色，Jay Fung更刻意全日不苟言笑「扮衰人」。

Jay Fung說：「今次新歌〈思念即地獄〉Wyman黃偉文寫嘅歌詞係講遠距離戀愛，而當中思念嘅痛苦令你感覺好似身處地獄咁，所以導演就提議用殭屍與人戀愛嚟表達嗰種遠距離。故事主要由談善言及岑珈其演出，我角色造型係一個殭屍獵人。其實開頭我有提出話想做吸血殭屍，但因為大家話我一向都好正氣好乖好紳士，冇說服力，所以我今日全日都唔敢笑，內心要不斷提醒自己諗啲好壞好衰嘅嘢，令到成個人感覺冷酷啲。」

不過Jay Fung在現場最後關頭仍不時向導演爭取加戲，他説：「導演我拍對咀唱歌鏡頭時可唔可以特別啲？」導演陳偉武：「咁如果有時間就拍埋你吊威也飛嚟飛去啦，不過今日應該唔夠時間，下次啦。」

自己也曾深受遠距離戀愛之苦的Jay Fung，形容導演用人與殭屍陰陽相隔，來表達遠距離思念對方的痛苦，實在令人非常感動，導演陳偉武指出：「首歌係講遠距離戀愛，然後好痛苦互相思念對方，但其實描寫深刻愛情痛苦都見過好多，若果想形容嗰種痛苦好似俾人刺咗一刀咁，或甚至好似MV入面咁要流好多血嘅，個感覺會唔會再深刻啲呢？所以就安排Jay Fung做一個殭屍獵人，佢呢身造型加埋支槍，好有說服力。」

即聽〈思念即地獄〉，感受相思之苦