韓國空運巨型紗網裙拍MV 鄭欣宜體會何謂〈最難行的路〉

繼〈@princejoyce〉、〈先哭為敬〉、〈罰你〉之後，Joyce鄭欣宜年度第四首派台作〈最難行的路〉，她認為每個人的人生路各有不同，即使再難行，也不要太聚焦難行的部份，而今次Joyce拍攝MV，便親身體會到何謂「最難行的路」，因為形象指導為她安排了一條重量十足、令Joyce寸步難行的巨型藍色紗網裙。

今次MV中，Joyce會以三個不同造型出現，形象指導更在韓國空運了一條巨型紗網裙來港，配合現場的歐洲式建築，還有Joyce臉上的閃石妝，充分展現了她高貴而夢幻的一面。

「其實條裙今朝先到香港，因為好重、好大條，要五個工作人員合力先可以搬得起，好在拍嘅時候樣樣都好順利。」

由於巨型藍色紗網裙「重量十足」，期間導演要求Joyce「試吓行前兩步」，但最終失敗，完全體驗到何謂「最難行的路」。

「雖然我唔特別覺得自己條路難行，我反而好相信每一個階段、每一段路都有佢嘅原因，先可以帶到我嚟到今日嘅呢一個地方。」

接著Joyce換上火紅色晚裝，被多位舞蹈員指罵，當中一位高人一等的型男，其實是新加盟寰亞大家庭的Scott蔡浩然，當日前來客串Joyce MV的他，原來是第一次拍MV，Scott說：「好開心入咗寰亞之後多咗機會去試新嘢，早排第一次拍電影，今日第一次拍MV，仲要係幫欣宜拍，自己跳開舞，MV又有跳舞嘅元素，希望可以展示自己擅長嘅地方，等大家了解我多啲。」

至於另一個造型以黑、白色為主，Joyce更戴上百萬珠寶進行拍攝，她搞笑說：「Oh my god，造型師冇同我講要戴咁貴嘅珠寶，但今次MV三個造型我係未試過，所以我覺得好amazing。 」

除了造型上的驚喜，收到Wyman所填的〈最難行的路〉歌詞時，同樣給Joyce既驚喜又感動。

「之前睇過Wyman一個社交網站嘅post，係佢以前幫其他歌手寫過嘅歌詞，嗰時電腦未普及，每一份歌詞都係用人手寫，當時我同過佢講『我又要』，但無奈我第一次同Wyman合作係2015年嘅〈你瘦夠了嗎？〉，一切已經電腦化，但今次我收到呢一份〈最難行的路〉歌詞嘅時候，係我一擘大眼、一打開個電話，就見到佢嘅手寫稿歌詞，我真係好感動，Wyman都有透露佢寫呢份詞嘅時候，自己忍唔住喊，好多謝佢！」

其實早在去年，Joyce已收到〈最難行的路〉的曲，直到今年才推出，Joyce解釋：「呢首歌係徐沛昕作曲，舊年收到首歌嘅時候，一聽就覺得好搶耳、好快識得跟住唱，所以hold起咗，而家加埋Wyman嘅詞，諗住做年尾嘅一個major plug。」

即聽〈最難行的路〉，寧願不揀最易的路