陳卓賢新歌〈Distance〉以關係破壞自我封閉為題 重錄新歌以最好呈獻給歌迷

陳卓賢@MIRROR（lan） 今年先後推出了〈留一天給你喘息〉及〈Got U〉兩首甜到漏情歌，並預告會在演唱會前再推一首新歌；一首自己好喜歡沖涼聽、瞓覺聽的新歌。 lan 趕在演唱會前再推出新歌〈Distance〉，繼續由 lan 作曲、他和 T-Rexx 聯合填詞，但內容卻是講人與人間的距離，最後甚至學會沉默、收起情感去保護自己，MV 亦全程 Poker Face 示人。lan 為力求完美，更主動要求重錄新歌，將最好的呈獻給樂迷，他說：「聽完覺得自己唱得唔好，仲有進步空間，vocal 係同之前有啲唔同，唔知大家聽唔聽到，我自己真係幾鍾意，都希望大家鍾意。」

〈Distance〉的歌名，lan 表示打從 demo 時已經決定好，是講述一段關係的距離。lan 說：「是源自於一段關係曾經好 close，演變到無以前咁好就會開始慢慢覺得有一段距離。距離如同封閉自己，曾經在一段關係、一件事上放了很多心機，用心去經營，付出許多，但結果不是理想中，彼此愈走愈遠，傷心失望會令你封閉自己，以免自己再受傷害。」所以今次 MV lan 演繹時不會有太大情緒起伏，由開始接受傷心不懂反應，到強迫說服自己接受，Poker face 一直存在，像歌詞「撲克式的臉」喜怒不形於色，是一種保護自己的意識。

問到 lan 予人性格內斂、收埋自己，是否都是一種自我保護意識，lan 笑說：「可能我俾大家誤會，無表情就係嬲或者唔開心 ，就好似大家俗稱嘅黑面，但其實唔係，真實嘅我成日都放空發呆，唔係有咩情緒，純粹休息狀態。」lan 亦補充，有些人外向、有些人較内斂，内斂的人性格就可能是「收埋自己」，好少把情緒掛在口邊，但這是他的性格亦不代表這就是負面。

至於〈Distance〉的創作上，lan 繼續身兼作曲外，自〈Got U〉與 T-Rexx 首次合作後，今次再找來他填詞，lan 說：「上次〈Got U〉合作好開心，所以直接問 T-Rexx 有無興趣一齊寫，而因為一齊寫就傾咗好耐，大家都諗咗不同故事，然後一直修飾到現有版本。」不過原來現時出街版本是重錄，lan 解釋之前瞓覺聽、刷牙沖涼聽的是 demo 版本，但在歌曲錄完再完成後期後，lan 反而明顯少聽。在他認真再三聽過幾次後，發現原來是自己問題，說：「聽多幾次係自己唱得唔好，所以喺度同合作單位致歉，始終麻煩到大家。但我諗法係一日末面世，仲有進步空間，一定要做最好版本，今次 Vocal 上大家可以留意吓，希望會俾大家發現有所不同。」

即聽〈Distance〉，啟動自我保護