泳兒 10 月九展舉行「Vincy Chan Breaking Live 2022」 「要做一個冇break嘅演唱會」

泳兒（Vincy）近年憑一系列的暗黑風格歌曲，如〈溝渠暢泳〉、〈荊棘海〉等橫掃多個樂壇頒獎禮的歌曲獎項，〈溝渠暢泳〉成績更相當矚目，早前推出的〈早上 37.2 度〉亦然，事業再上高峰。Vincy 日前宣佈將於今年 10 月 2 日於九展 Star Hall 舉行「Vincy Chan Breaking Live 2022」。

繼 2019 年的演唱會，事隔三年再開 show，Vincy 十分興奮，「係我轉咗暗黑系列之後第一個個人演唱會。」演唱會主題為「Breaking」，亦寓意自己這幾年的 break through，要衝出舒適圈，重新審視，把自己舊有的概念粉碎然後重新整理、沉澱，「喺呢個過程中我搵到自己嘅方向、想做嘅音樂，唔再留喺自己嘅舒適圈，所以諗到『Breaking』呢個 theme 作為今次演唱會嘅主題。」

拍攝海報當日換了三個造型，這次拍攝亦是 Vincy 歷來最輕鬆的一次，除了跟創意總監、攝影師、美指及造型師等合作無間，默契十足讓整個拍攝十分順利，另一個拍攝順利的原因是這次 Vincy 拍攝都不需要太多的郁動，每一造型都只可作有限度的動作，其中一個造型是 Vincy 頭部從圓形木板伸出，猶如舞台的升降台在台下升上台面的感覺，「因為木板個窿都係細嘅，帶住嘅耳飾又比較大，所以係唔需要郁之下快速完成拍攝；而另一個造型服裝 cutting 好貼身兼長度過膝，只可以小碎步咁行，又係唔駛郁系列，哈哈。」這一次海報拍攝，以玩味感捨棄以往的華麗靚靚造型，無非也是想帶給大家全新的「Vincy Chan Breaking Live 2022」。

至於演唱會 rundown，Vincy 自言很想做一個沒有「break」的演唱會，希望觀眾得到一連串的視覺及聽覺的享受，「就好似睇一套電影咁，可以 focus 喺電影裏面，可以放鬆心情，好好享受。」

KKBOX 付費會員可以於 8 月 22 日優先訂購「Vincy Chan Breaking Live 2022」門票，8 月 24 日門票於 HK TICKETING 作公開發售，票價分為$780、$580 及 $480。

即聽歌單，為演唱會預習！