古巨基音樂企劃第二炮邀 MC 張天賦合作 推出〈自我安慰〉合唱版
古巨基音樂企劃「I Really Love To Sing」第二炮請來 MC 張天賦合作，日前推出歌曲〈自我安慰〉合唱版。
由於疫情反覆，最初基仔是透過短訊和視像通話跟 MC 張天賦討論相關合作，直到「實體」見面已經是大半年後的事，基仔表示：「我哋正式聯絡係舊年，而家大家見到 MV 出現嘅時候已經有大半年，因為疫情所以過咗咁耐先可以郁番去錄音同拍 MV，我原本真係好想快啲可以進行，不過唔緊要啦，好嘢唔怕遲。」
提到受到基仔邀請，MC 難掩興奮，「我係超！級！開心！收到你 message，嘩……！唔知呀，原本個距離係好遠㗎嘛，剎那間佢 WhatsApp 我喎！你諗吓有一日你瞓醒，『喂，我係古巨基呀……』嗰吓係好突然，用言語解釋唔到，但係真係好驚喜，同埋知道可以一齊錄歌、去合作一首歌，嘩！好有型！」
基仔直言對 MC 印象深刻，「每一個時代嘅樂壇都需要一啲好有實力嘅唱將，做一啲可以繼續流傳落去嘅歌。我聽到 MC 唱歌嘅時候，覺得佢嘅能力係呢個樂壇、呢個時代，其中一位非常有實力嘅唱將，所以邀請佢一齊參與呢個企劃。」基仔又謂在這個企劃開始前，曾在自己社交平台收集網民意見，邀請哪些歌手合作，有不少網民「提名」MC，更說 MC 入行前唱過基仔的歌曲，「咁我就搵啦，我真係搵到一啲片段，有 Busking 翻唱。最深刻嘅一段係佢喺間餐廳表演，我覺得喺餐廳個音響、環境各樣可能唔算係最『靚仔』嘅情況下，但佢都可以唱出咁『靚仔』嘅聲，我真係好深刻。」而 MC 坦言自小便喜歡模仿基仔唱歌，甚至假音也是從基仔中學習練成，「我練到假音真係因為聽你啲歌㗎！好似〈歡樂今宵〉、〈第二最愛〉，我係聽你嘅歌練到個假音返嚟。」
至於 MV 中，MC 飾演舒文監製的助手，「剛剛一幕戲係我幫古 Sir set 咪錄音，係一種同佢擦肩而過嘅感覺。」MC 更解構〈自我安慰〉嘅 MV，與之前的〈飄流教室〉是上下集的故事，大家看完便會明白。
而 MV 女主角再次找來 Natalie 擔任，基仔表示覺得 Natalie 演戲不錯，問 MC 有何感受，MC 則謂二人第一見面已經是於大澳拍攝那天，他表示很擔心需要花很多時候讓 Natalie 適應、warm up，但最後卻來個反高潮，「喺大澳見到佢，佢第一句就：『Yo！What's up！』就過嚟擊掌先喎！反而輪到我驚自己需要 Warm up 啦，其實好快好順利地就熟落咗。」聽到基仔也忍不住大笑起來，十分搞笑。
延伸閱讀
最新文章列表
