郭嘉駿@ERROR 邀鄭裕玲客串新歌 MV 拉謝安琪張繼聰黃偉文聯手做歌答謝 Fans
推出過兩首情歌後，郭嘉駿@ERROR（193）第 3 首個人單曲〈越州公路 193〉是特別送給他至愛的 Fans，以答謝他們一直以來的支持，而 MV 亦特意找來鄭裕玲（Do 姐）客串，噱頭十足！
193 一直很想做一首歌送給 Fans，但卻不想「畫公仔畫出腸」，所以〈越州公路 193〉找來謝安琪監製、張繼聰作曲、黃偉文填詞，唱出一個人移民外地，但靠聽廣東歌去支持自己尋夢的故事。193 道：「歌詞裡提及聽廣東歌，係比喻啲 Fans 一直支持我，一直聽廣東歌呢種堅持，先令我可以行到今日，甚至終於可以同 Do 姐拍嘢，知我咩料啦！」
貫徹 MV 要有女主角，但歌曲卻是送給 Fans，所以 193 便想：「MV 一係冇女主角，一係就要搵個好勁嘅女主角。」結果他便誠邀 Do 姐為 MV 客串。「MV 裡面有出現過 4 個地方：台灣、加拿大、倫敦及香港，當中需要一個好高貴嘅角色，而我心目中最高貴嘅就係 Do 姐，所以諗住碰下運氣，問吓又唔使錢，點知佢一口答應咗。之前唔夠膽問，係怕有好多合約上嘅問題，所以都費事問，免得面懵懵被拒絕。」
為展現 Do 姐高貴的一面，193 不但找專人設計 Do 姐在 MV 中的造型，再配以閃亮鑽飾，並出動私人古董車，將它改頭換面變成的士。193 道：「一直覺得 Do 姐氣質好襯倫敦，同埋佢成日喺電台節目講英國皇室嘢，所以有 Do 姐呢個似係英國皇室，但去葬禮嘅造型。」看到 193 的種種心思，當事人 Do 姐不諱言道：「我有理由相信你係暗戀我嘅，我無以為報喇！所以你問我可唔可以客串，我怕咗你喇，所以就客串了。」
193 得逞後，仍得一想二，問 Do 姐除了客串 MV，還可不可以有更多的答謝，Do 姐卻投訴 193，道：「仲想點？我冇客串過 MV，仲以為有好多對手戲，點知係冇乜，仲諗住測試下你嘅演技！」193 聽罷即說自己演技超卓，Do 姐聽到即笑住繼續投訴，道：「但今次我同你嘅合作戲份就少咗啲。」193 立即解釋，說：「搵到你客串已經好好，唔夠膽要你咁操勞，同埋我驚多戲份 Do 姐會拒絕我，所以我一直氹住Do 姐，好快！嚟 1、2 個鐘就可以。不如下次你做女主角，我哋打車輪！」Do 姐也真的被 193 氣壞，沒好氣道：「所以我咪話你暗戀我囉！」反應快的 193 即道：「我呢啲係明戀啦！做到咁足！」
這次 Do 姐客串MV，未有收取任何酬勞，只求拍得夠靚，193 也認真表示不知能怎樣報答對方，Do 姐便表示：「家家有求，第時有嘢要你幫忙，就搵你幫手。」193 指就算為 Do 姐打掃屋企也可以，因為他聽說 Do 姐屋企很大，很想參觀一下，他更誇下海口：「最多約埋姜濤一齊嚟。姜濤而家整傷隻腳，我可以幫手推輪椅。」Do 姐聽到即笑逐顏開，更說：「好喎！無任歡迎，ERROR 其他 3 個可以唔要了！」其實除了 Do 姐，193 亦找來 30 名 Fans 參與演出。提起 Fans 們，193 也感動起來，說：「呢個 MV 唔係好見到佢哋個樣，但我唔想搵臨記客串，意境、意義上大於一切。呢 30 位 Fans 係最早跟我嘅，所以就叫佢哋嚟幫手，佢哋唔出樣，但大家心領就 OK。」
看更多
最新文章列表
