古巨基 Tyson Yoshi 驚喜聯乘 古 sir 大讚 Tyson Yoshi「全能嘅Creator」

古巨基音樂企劃《I Really Love To Sing》再次帶來驚喜聯乘，與 Tyson Yoshi 重新塑造經典歌曲〈2nd Favourite第二最愛〉。

關於這次合作，基仔說：「我大概年半前喺 Youtube 聽到 Tyson 嘅音樂，後來搞《IRLTS》就好想邀請佢合作。認識 Tyson 後，發現佢除咗做音樂、寫歌、Produce，佢連做導演、story board、美術，所有嘢都好全面。我話：『你唔只係『Singer』，你係個全能嘅『Creator』」。

今次選曲，基仔亦給予 Tyson 100% 的自由度，「雖然本身個 Project 係想揀啲以前嘅滄海遺珠，但係 Tyson 話畀我知佢第一首聽到我嘅歌就係〈第二最愛〉，我覺得既然咁有意義就當然跟佢揀呢隻歌。我心諗：『我都幾期待呢隻歌可以點樣變成你嘅 style。』」Tyson Yoshi 透露收到基仔短訊，表示想「做首新嘢」，他即謂：「Why not both？所以就有呢個咁嘅 combination，就咁講係好難明，但大家去聽咗首歌就明㗎喇。即係又係新歌又係舊歌嘅一個作品。」基仔更着大家要細味歌詞，Tyson Yoshi 表示，這次他跟另一位創作人 Issac 為歌曲填上新詞，「基本上我完全係將聽嗰首歌『第二最愛』嘅感受，即係嗰種冇人陪又唔係，但係其實又極度充滿呢種孤獨嘅感覺，好直接咁寫出嚟。你一路搵唔同嘅人去陪，諗住搵到一個，但其實冇一個係，你都仲係掛住以前返唔到嚟嗰個，嗰隻 feel。」

談到錄音過程，Tyson 指：「以前係喺電視見到你，而家你喺我面前，我戴住耳機聽住你即時唱嘅歌，好難形容嗰種感覺！」基仔即刻話：「好似貞子咁（恐怖片）喺電視爬出嚟？我又夠係喺 YouTube 睇開你，你喺電腦出咗嚟我面前，一樣好難形容呀呢種感覺，哈哈～」

基仔稱今次〈2nd Favourite第二最愛〉亦係《IRLTS》唯一一首全面交託給合作單位的作品，包括重新改編、監製、甚至 MV 執導方面，都由 Tyson Yoshi 親自操刀。Tyson：「mv 講述一個現代壞男孩孤獨嘅故事，然後上一代嘅壞男孩（指着基仔）而家已經做咗爸爸，以一個過來人嘅身份喺中段出現，唱番原版嘅歌詞。哈哈，我意思係話喺個戲裡面古 sir 飾演上一代壞男孩。個故事係每個男仔、男人都會經歷過，或者 feel 到過嘅另一種 loneliness，係幾好玩嘅。」

基仔亦表示這次 mv 拍攝十分有趣，「我主要係匿喺 Tyson 嘅床下底唱歌。」又更乘機「取笑」Tyson Yoshi，「床上面啲主戲交晒畀你演喇，有好多囡囡。」Tyson Yoshi 立即反應：「係！嗰邊仲有好多仔仔㖭。」隨後基仔在拍攝現場指著一個內衣並拿着說：「但你掉啲咁嘅嘢落嚟⋯⋯」Tyson Yoshi 隨即表示：「乾淨嘅乾淨嘅。」認真搞笑。

即聽〈2nd Favourite第二最愛〉，細聽兩人火花