容祖兒倫敦演唱會排除萬難完成 與歌迷於London Eye合照打卡

容祖兒剛於倫敦殿堂級劇院The London Palladium完成「Pretty Crazy Love in London」世界巡迴演唱會。是次的歐洲巡迴，祖兒坦言很緊張，皆因不少國家也受到疫情影響，家人及朋友也擔心她的健康。慶幸所到之處，荷蘭、倫敦等地，均未受到嚴重的威脅。經團隊在排除萬難之下，終於在安全又開心的氛圍下完成，沒有令歌迷失望。

祖兒表示，以往都會帶媽媽，但今次卻沒有。因為媽媽大病初癒，身體抵抗力較弱，所以留在香港不出門較安全。祖兒：「媽咪都冇話好擔心我，佢知道公司同事會照顧我，剩係叫我加油。有啲人都問我，呢排冒咁大風險飛來飛去驚唔驚? 。我自己少少緊張咁啦，又唔係好驚，都有做足保護措施。咁多海外歌迷咁錫我，佢地期待左好耐，我唔想令大家失望，自己可以咪盡力去做。希望大家睇完騷，個個都開心，人人都百毒不侵。又希望疫情可以快啲過去，咁又好快再有機會再同大家見面。」‬

今次世界各地歌迷都有跟著祖兒飛到歐洲捧場。得悉歌迷遠道而來，寵粉祖兒特意約這些歌迷，一同於倫敦景點London Eye前影大合照留念，令歌迷十分開心。Joey：「佢地咁遠都每站跟，平日做完騷又好少機會同到佢地傾計，咁難得所以就約大家一齊打個卡留念。」此外，祖兒又在倫敦踩單車：「喺荷蘭已經好想踩，但冇人肯陪我，時間又唔係好配合到。去到倫敦踩左一陣算達成心願，不過踩唔到半個鐘已經走啦。因為好凍，著唔夠衫，對手直情凍到僵曬，驚自己冷親會影響演出 ‬。」‬

出道二十週年，祖兒和巨星Madonna同樣於倫敦的The London Palladium開騷。祖兒在巴黎時還特意去看對方演出：「我好好彩，睇到佢巴黎最後一場演出，之後佢就因為疫情暫停了。我睇Madonna嘅時候，佢扭傷左腰骨。但喺舞台上面，佢一樣展示出驚人強勁魄力，真係令我好佩服佢對音樂對舞台表演個份堅持同毅力，勁到唔識形容。今次自己二十週年巡迴，可以順道睇到娜姐演唱會，比我一個好大的精神鼓舞！希望到下一個二十年，我都有娜姐咁勁的魄力，繼續喺舞台發光發亮。」

據知，祖兒巴黎的巡迴演唱會，亦因疫情影響二臨時取消。祖兒 : 「係呀，其實我地每一站都好緊張，每日不停開會又開會，時刻都留意住疫情發展，留意當地政府公佈，再去決定係咪可以安全開騷，一定唔會亂嚟。所以就算巴黎歌迷朋友話好失望，叫我地唔好取消，我地都冇辦法，最緊要大家安全，唯有希望疫情快啲過去，好快可以喺巴黎再見大家啦。」

回港之後，祖兒表示會先休息：「返香港我諗會自我隔離下先，都係留喺屋企休息唔出去，少見人。保重身體，唔好病囉。」